Tou, tou, tou pou nou toutou...

Woof ! Woof ! E wi, mo bann lamour ! Zot fet zordi. Zordi le 26 Out, enn zour extra spesial pou zot parski se Zourne Internasional Lisien atraver lemond. Se enn lokazion pou rapel sa lien extraordiner ek inik ki exist ant bann imin ek bann toutou depi boukou lane. Ek ousi fer nou reflesi lor bann problem ki boukou lisien ankor pe sibir kouma maladi, abandon, maltretans ek malnitrision.

Azordi bann toutou finn gagn enn pli gran stati ki sinp gardien lakour. Zot finn vinn bann vre kamarad ek souvan plis ki fami, otan pou zanfan ki pou seki pli gran. Enn konfidan pou serten, enn konpagnon pou lezot. Lamour ki partaze, konplisite ek relasion ki kre, enn zafer ki pa kapav explike. Ena boukou ki pa arive konpran sa, ena trouv sa bizar. Pa remark ki manke me mo prefer pa site. Me pou seki kontan, sak ti zafer konte: enn ti regar, enn ti figir pov diab, enn ti kout lalang lor figir. Ler li poz latet lor to lazam, vir lor so ledo pou to kares so vant ou grat to lame pou to donn li enn ti bout gato. Boukou bann sign, bann zes ki exprim sa lien spesial ek mazik la. E san to realize, to fini vinn pagla(i). Me to kapav sir ki sa lamour-la li vre, li pena pri parski li parfe ek li pou touzour.

Pou boukou li vinn natirel pou obzerve, dekode, sey konpran, interpret fason marse, zape, manier bouz lake ou zorey. Avek pasians ek souvan ant-de-ker, to viv bann letap aprantisaz ek peryod adaptasion me anfin arive instal bann routinn. Kan pa pe kone ou pa sir, chek lor Google (Mersi toutoupourlechien, assuropoil ou wamiz…). Gagn seve blan kan bizin regle bann ti kriz zalouzi, si kouma mwa to ena plis ki enn. Leker bat dan mole kan enn kout li sove, li al lor sime ou kan to trouv li inpe kagna-kagna, pa oule zwe ou manze. Bizin nek manz kou kan gagn koze k***on ek vwazin parski ti pinguet-la finn kas zot somey 3-er di-matin. Louvraz double parski bizin pas aspirater ou bros sali pli souvan. Parfwa, to sap lor kal kan zot fer bal ou tou kalite betiz. Tou sa pou dir ki enn lisien dan to lavi li koumadir enn siklonn; parfwa rafal, parfwa kalmi, souvan move-tan me nou fer tou pou profit botan. Nou sey rann zot lamour, fidelite ek boner inkondisionel ki zot donn nou toulezour. 

Zordi zour, pou boukou toutou, lavi finn sanze. Nepli atase avek gro lasenn anba pie tamarin, dan lapli, soley avek enn bol manze lavey. Aster dimounn konn apresie ek pran plezir okip zot, pas letan ek zot pou zwe, fer kalin. Tret zot kouma bann ti prins ek ti prinses. Ena ki dormi lor lili ek zot met, lezot dan bann zoli ti lakaz, lor molton, dan panie. Zot manz bann bon ti manze ekilibre, bengn dan benwar, al fer twaletaz ek bann ti balad dan loto ek fer fet laniverser. Seki anvi vinn pli kokas met ti linz, baret ek zoli kolie. Zot bien-et ek lasante finn vinn enn priyorite. Bann kabine veteriner full: vaksin, tretman kont lever ou karapat, parfwa mem loperasion kan neseser. Enn sinp ti bobo, gagn traka, sot dan loto amenn konsilte. E dan lasal d-atant, an-atandan nou tour, nou rant kamarad avek bann lezot met, nou aprann plis lor lezot ras lisien, partaz bann ti anekdot ek bann ti konsey bien itil.

Si boukou lisien pe resi viv enn ti lavi kool, malerezman ankor ena boukou ti malere ki pena sa sans-la. Me erezman kiksoz pe koumans sanze avek bann kanpagn ki diferan asosiasion pe fer pou sansibiliz dimounn lor problem lisien eran. Ena ousi bann diferan paz lor rezo sosio ki permet protez ek adopte bann lisien, bann ti mesaz « Fer tansion kamion MSAW » dan tel landrwa ek bann dimounn gran leker kouma La « Belle » de Sable Noir ki donn zot enn fwaye.  Sa fer plezir pou trouv solidarite bann Morisien ek li rasiran  ki ankor ena bon dimounn ki anvi donn nou bann ti kamarad 4 papat enn meyer lavi. Li ankourazan pou trouve ki mantalite pe sanze. Parski nou pa get ni zot ras, ni kouler, ni groser, sak toutou merit lamour ek enn fami.

Alor si to anvi kone (si to pa ti ankor realize) si twa ousi to enn vre « Mama Lisien » ou « Papa Lisien », chek lalis ki ena anba (lalis-la pa fini la!).

1. To lavi net tourn otour to toutou.

To koz li touletan ek organiz to letan ek tou to zafer an-fonksion to toutou.

2. To pans to toutou avan twa.

Kan fini kwi pou li (zot), to leker kler! Mem si twa to pou al manz dipin gato pima pou dine!

3. To ena plis foto to lisien lor to portab ki to prop foto.

Ek to portab pe dir “Insufficient space. Please delete unnecessary files!”

4. To pe pans pou al ouver enn kont kot Elie & Sons pou to toutou.

Bann rar fwa ki to pans lamor to lisien parski pou twa...zame li pou mor!

5. To kontan to toutou plis ki laplipar dimounn dan to lantouraz.

Parski fran tou, mo'nn koumans inpe dekouraze ar bann imin mwa.

6. To koz ar to toutou koumadir to pe atann ki li reponn twa.

“Soyez sages. Maman va travailler!” “Arete la in! To pou gagne ar mwa la!”

7. To pa ankoler kan li manz to bann zafer.

Soulie, brasier, remote… tou pase dan pake. Euuta les li ! Li ti pe anvi zwe !

8. To fer dimounn vinn vey to toutou kan to pa la.

Lerla gagn komanter! Pfff! Me si granmer ou tonton anvi veye! Ki problem?

9. To aste enn freezer pou met zis manze lisien.

Parski to ena 5 lisien e ki zot manze pran plis plas ki seki pou twa.

10. To ena enn bidze pou to lisien.

Rs500 veteriner+Rs600 twaletaz+Rs1000 manze… pre pou depas pou twa!

Bon, si to’nn gagn plis ki 5 ladan, vedir to’nn fini bezeted ! Me to kapav rejoice. Zot mari vo lapenn!

Mo ena lasans ena bann dimounn formidab dan mo lavi ki partaz mem pasion ki mwa. Bann ki kouma mwa"mor pou zot toutou!"

E san ezite, zot finn aksepte fer zot ti gate partisip dan sa lartik-la.

1000 Mersi a zot! 

Vwala! Mo prezant zot mo bann zoli ti mannkin!

PRINS: Zinga, Zouky, Sako, Kenzo, Junior, Cielo, Dafi & Pirate

PRINSES: Zoe, Skarlet, Shadow, Lara, Bob, Zara, Darling, Corsaire & Surcouf 

Mersi a sa bann ti et exsepsionel ki

rann nou pli ere ek nou lavi pli zoli sak zour!

*** Mo swet zot tou bonn fet! ***

Enn ti panse spesial pou bann ti anz ki finn kit nou e ki pe get nou depi lao. Zot pa ek nou me zot pou touzour dan nou leker.

Sours Zimaz: Google Image

Sours Foto: Fran, Karine, Clarine, M.Joyce, Ornella, Marie-Michelle, Milla 

Comments

[Wtf]

Putain l'orthographe, c'est fait expres?

Désolée. Le texte est écrit en Kreol Morisien.

[Gilbert]

Kan zot nepli la mwa ki pou pran plas lisien...

[Fran]

Wiiii..... "Tu seras l'ombre de mon chien..." Brel inn bien dir!

[Nicole]

Merci pou sa zoli artik la. Touzour tre talentueuse ek to decrir bann kiksoz avek telman de realism. Bravo.Tre bel homaz a nou bann compagnon a kat patt. Gross pense pou mo Oscar ki finn partaz mo la vi ek finn donn moi bokou bonerr pendant 13 zan.

[Fran]

Mersi bokou. Mersi sirtou parski to enn bann dimounn ki touletan pe felisit ek ankouraz mwa. A wi, nou bann ti konpagnon lavi ki donn nou enn lamour inkondisionel. Mem zot nepli la zot res touzour dan nou leker.

[Clacla]

Se vre ki ena dimounn pa konpran kouma nou lavi kapav tourn zis otour nou lisien. Mo etonn momem kan mo retrouv mwa pe rakont anekdot lor mo lisien kan lezot pe koz zot zanfan. Ena bon kamarad konpran, ena vexe panse ki to pe konpar zot piti ek lisien...Mwa mo dir arete sa bann prezize-la bizin sanze. Mo kapav pena zanfan me gras a mo Lara monn konn lazwa vinn enn mama...mo retrouv mwa dan bokou pwin ki tonn site dan to lartik e fransman, mo pa regret oken, aksion, zefor ou sakrifis ki mo fer pou mo lisien. Li vo lapenn kan mo pans tou sa boner ki li donn mwa-la.

Monn remarke ki pou seki kontan lisien vremem, zot pa kontan zis pou zot, zot kontan tou lisien, mem seki malang-malang lor sime. E bann lamour-la kone ki sann-la ki kontan zot.

MERCI ANKOR POU TO LARTIK FRANN. BONN FET BANN TOUTOU