13 Décembre 2017
Wi vouzot!!! Dan de semenn, nou kapav dir bay-bay 2017. Zot santi sa lanbians lafin lane la? Lekours ferme dan Senn-Mars. Ala li large dan lari, lor trotwar, dan lakaz…! Ler pas dan Porlwi, dimounn kouma fourmi, pena plas pou marse! Ler santi delo pe koul dan ledo, saler pe donn bal, fer anvi devor enn trans melondo ou bwar enn zi glase. Ler get dan vitrinn magazin pri ek promosion finn afise an gran, oblize arete, rantre. Ler pas enn kout dan lafwar, tann marsan pe kriye : « Aila…koste gete ! Nouvo zouzou mo’nn gagne la… ». Ler fer enn letour dan sant komersial, bel animasion, Bolom Nwel dan « Late Night Shopping ». Ler zorey fermal ek dis-de-lane lor radio (komie kategori ena sa lane-la ofet?). Ler bann leksi, zanana ek mang finn tale dan panie marsan lor trotwar. Ler trouv bel flanbwayan finn fleri de kote sime kan pe roule. Aaaaa ! Pa kapav dir ki lane pa pe koste. Zanfan, zenes, gran dimounn, vie dimounn, tou dimounn pe fit!
Wi pe fit pou lane-la fini. Ek ankor pli fit pou ki nouvo lane-la vini. Me sak lane, mem repetision. Ant lexitasion ek lanbians bann fet, ena ousi inpe stres ki vinn ansam. Mo sir zot pou dakor ek mwa.
Stres nimero 1 : Ayo mama ! Louvraz !
Sa enn routinn ki pa sape sak lafin lane. Boukou pe koumans plengne : ena boukou pou fer, pena ase zour, fer so, pena delo... Finn ler pou tir tou rido pou lave ouswa si tro vie, zete, aste lot. Lav tou vit, bros sali, koup lerb, pas karcher pou tir gomon. Rezman nepli ena sali rouz pou brose. Enn gout zafer dan seo delo, enn sel kout mop, marb inn prop. Kil tou meb – retrouv bann zafer ki ti kwar inn perdi. Pas aspirater lor matla, anba lili, lor sofa, tir lapousier dan bann kwin. Enn ti kout lapintir lor miray pou tir tras ledwa. Met lord dan larmwar, plor touzour akoz ena bann linz ki nepli rantre. Devid arzantie (bife, vitrinn…), rins bann vesel ki pa’nn servi ditou, remet dan arzantie. Rod enn bon plas pou met sapin. Bizin met partou bien prop avan lot lane-la vini. Anfin ki pou fer, samem ki apel louvraz lane!
Stres nimero 2 : Portmone defonse!
Wi! Sa lepok-la portfey plore mem sa! Toule lane, nou dir mem zafer : « Ayo sa lane-la pa pou fer foli la in! Pa pou depans kas bonavini ! » Hahahahah ! Kote! Alor, pou nou pa santi nou tro koupab, nou dir : «Be bizin sanz inpe sa lane-la, fer inpe nouvo kiksoz…! » Lerla mem al tase la. Gagn tourdisman ek sa kantite nouvote ki trouve partou dan bann reklam, lor televizion, dan radio, dan zournal, lor poster, lor bilbord, dan vitrinn. Promosion, deal, zwe-konkour, tou taktik bon pou atir pli boukou kliyan ek fer vid zot pos. Koumadir ena enn lespri mesanste dan ler ki dir twa : « Pran sa…aste sa…!" Kan to al magazin pou aste enn payason, to retourn lakaz ek enn konplet dra/tedorye/dra-ous, enn rido dous, enn gran moul gato, trwa serviet, enn vaz ek dis goble plastik (parski kouler-la pou al bien ek lakwizinn). Ek pa bliye enn bidze spesial pou petar, fedartifis ek tou bann atiray, sapin ek dekorasion. San to realize kas bonis la pre pou plat ek anplis pankor aste linz ek kado!
Stres nimero 3: Ki linz pou mete ?
Napa dir ki pena swa. Zisteman ena tro boukou swa. Seki prefer fer koud, bizin amenn latwal kot modis depi boner. Si pou aste “online” biensir bizin pas komann depi bien avan. Sinon pa magazin ki manke. Konpetision feros. Toulezour enn nouvo baz ouver kikpar, dan sant komersial ou dan enn ti koulwar par la, mem si apre fet li sanz baz. Depi de-trwa mwa bann nouvo zafer finn debarke. Toule lane enn gran varyete ek swa linz, soulie, bizou ek akseswar pou tou bann gou ek bidze. Ankor pli boukou zoli model, stil, kouler ek matier. Ena de kwa bat dan abriti. Anplis lete-la, profite pou met bann ti batman serye. Kont bien komie linz bizin (enn pou al lames pou Nwel, enn pou le 1e, enn lot pou le 3 kot matant intel…ler konte fini ariv 7!). Bizin bien reflesi kot pou al fer shoping. Parski to pa pou anvi met mem linz ki to vwazinn la. Si li pou aste dan Rozil, nou va al Kirpip nou.
Stres nimero 4: Ki kado pou done ?
Kan nou koz lafin lane, biensir nou koz Nwel. Normal, Nwel, nou pans kado. Me kan pans kado, latet fermal. Si to enn paran, to anvi fer to zanfan plezir me anmemtan to pa tro oule malelve li. Kan to mazinn bann nies ek neve, lafiev monte. Pa fini. Ena kado pou adilt ousi. Ena kado ki ofer enn fami pros ou enn bon kamarad avek bon-ker. Ena kado ki ofer par obligasion (Ayo, pa ti anvi partisip dan sa esanz-kado la, me ki pou fer!). Ena ki lev nene ar kado, atann bann kado ser kouma portab, parfin ou bizou. Ena ki kontan gagn kado me zot ena plin krab dan pos. De tout fason ena plin swa ant bann kado « fait maison » ou personalize ek ousi bann « voucher » san ki bizin fer tro depans. Bizin zis panse si dimounn to pe ofer kado-la li vo lapenn pou apre to pa regrete! Me seki mo trouv pli interesan se kado ki to fer twa, tomem. To pou fer twa plezir ek si zame personn pa’nn panse pou donn twa kado, omwin to pa pou tris.
Stres nimero 5: Ki pou manze?
Lontan ti atann lane pou touy enn poul, pou prepar enn pla spesial, pou bwar enn bon boutey. Avek bann fasilite ki ena aster, komdi koze, toulezour fet! Problem, kan ariv lane nepli kone ki pou kwi. Al rod sekour lor internet pou gagn bann ti reset orizinal. Ou kan al fer letour dan sipermarse, kapav gagn inpe lide. Kapav pran denn ou kanar ou profit bann prodwi « du dehors » kouma fwa gra. Ena ousi bann pla tradisionel ki ankor touzour a-loner kouma salmi tang. Ou sinon enn ti griyad ki bien lamod dan lete. Bizin pa bliye bann labwas-la ousi. Seki glase ki lekor pou pli dimande la. Nou fer nou stok pou pa manke. E biensir, zame pou aret dir : Amize pa abize! Kan bwar pa kondir! Sinon seki anvi sanz inpe ou seki ena lemwayen, bann restoran ek lotel ofer bann meni spesial fet. Donk finalman, ena boukou swa. Zis bizin reflesi inpe ek fer labous ek leker plezir.
Stres nimero 6: Kot pou ale?
Lontan Nwel ek lane ti bann moman vreman sakre an fami. Plan-la ti fini drese. Depi le 1e ziska le 8 Zanvie ou mem apre si fami gran, fini kone kot ki sann-la pou ale. Aster inpe difisil pou fer bann zenes-la al asize kot vie Tantinn pou ekout bann vie-la rakont zot lepok. Zot prefer al fete ek bann kamarad ou al zwenn bann minn-la. Souvan diskision leve (Pou al dine ou dezene kot belmer? Oblize al kot sa kouzinn-la?...) Ena prefer pas bann fet dan kanpman ou lotel pou sanz ler, pou relax ou pou pa bizin reservwar. Lezot profit bann zour konze pou vwayaze, al vizit fami deor, pou al pran inpe freser dan Lerop. Ek sa saler Desam la, enn bon ti lide al pas enn lazourne lamer ou mem kanpe. Amenn manze, bwar, latant. Met lamizik zwe dan loto pou gagn lanbians-la pli bien. Seki ena ravann amene, sinon boutey labier ek fourset roule mem sa. Profite biento pou nepli kapav sa!
Bon malgre tou sa bann ti traka-la, rezman sak lane nou resi trase pou ariv ziska le 31. Nou sey amize, sakenn dan so fason. Sak fwa, se enn lokazion pou nou reini ek pas bann bon moman an fami ek kamarad. Nou bliye bann move nouvel, bann moman difisil, bann ti biz-biz ki finn gagne dan lane. Nou rant dan lanbians fet, nou zwaye. Nou fer Nwel, partaz kado. Nou sonn petar, nou swet nou fami, kamarad, vwazin, koleg meyer ve. Nou profit ti kas anplis ki nou finn merite apre ki nou finn travay dir pandan enn an pou fer plezir. Nou remersi Bondie ki li finn permet nou trouv enn nouvo lane. An-atandan, les mo dir zot tou bonn fet. Mo espere ki zot terminn lane 2017 bien e mo swete ki lane 2018 ankor pli zoli.
Sours Foto: Google Images, Canva, Video & Meme Gif Generator
/image%2F2217958%2F20190213%2Fob_bbcf31_heart-hands.jpg)
/image%2F2217958%2F20180307%2Fob_9c8027_28908263-10156747834870476-202015088-n.png)
/image%2F2217958%2F20170825%2Fob_e80dbb_toutoupic.jpg)
/image%2F2217958%2F20170320%2Fob_e647c1_ob-6cd82c-plume211.jpg)