20 Mars 2017
Zordi le 21 Mars, nou pe selebre Zourne Mondial Poezi. Sa zourne-la finn proklame par ONU pou promouvwar ek ankouraz lektir, lekritir, piblikasion ek lansengnman poezi atraver lemond antie. Toutfwa, se enn zourne ki nou pa ase met an-valer. Antan ki enn profeser langaz, mo santi mwa interpele par sa levennman-la. Mo finn touzour fasine par sa mond-la ; kot panse, rev, santiman, lemosion, limazinasion, dezir, fantezi ek lamazi melanze pou kre enn tourbiyon ki donn bann mo enn dimansion extraordiner. Mo pa enn gran poet me mo santi mwa bien kan mo les mo lespri ale, mo panse virvolte ek mo ledwa glise pou mo met lor papie seki mo leker pe devwale, an tout liberte. Enn linspirasion ki mo'nn gagne, yer gramatin kan mo’nn ouver vole… Mo espere zot pou apresie.
Lapli…
Enn gout, de gout, trwa gout
Timid-timid, pa enn sel kout
Detanzantan, li araze
San fer kone, li nek kraze
Zet enn koudey dan lesiel
Plitar, tann dir lapli toransiel
Dan gramatin, pe trouv zekler
Ena lekol? Kouma pou fer?
Atann transpor pou al boulo
Fini tranpe ziska lezo
Ler rant biro, lizinn, santie
Strese, patron get gro lizie
Karo legim regagn sourir
Kapav kase, tou fri finn mir
Laliann file, zwenn lerb bourik
Krapo, kourpa pe fer koustik
Kares montagn, al ver lamer
Vers enn ti larm dan larivier
Basin bien sek, dalo grinse
Me kot tou dilo-la ete?
Reyon soley tap lor sime
Sof ti delo, fer lafime
Monte pli ot, li kit later
Res enn loder flote dan ler
Lakaz koule, matla tranpe
Pou ponp delo bizin koudme
Soulie, savat plin ar labou
Ena gagn tar pou randevou
Degaze, ena linz lor lakord
Rise, ploye, met dan lord
Ramas bilimbi, mang, frisiter
Kan soley revini, nou va refer
Zwazo, bebet perdi lakaz
Bizin trase pou trouv lot baz
Atann botan pou rod ayer
Espere gagn enn lavi meyer
Bann ki kontan so ti freser
Lor lapo, kan galoupe gagn ler
Lezot anvlope dan pardesi
Kous-kouse anba parapli
Dan lakoler zekler, loraz
Gagn gro lager ek tou bann niaz
Atann inpe, nou pa tousel
Parski pre pou trouv larkansiel
Sofer fer sir, sime glise
Lipie lor frin pou pa derape
Brouyar epe, pa trouv divan
Enn ti pasians, pran to letan
Lanwit-lizour li rann vizit
Parfwa dousman, parfwa tro vit
Enn soulazman kan pez saler
Isi-laba, mem dan liver
Riye-plore, sote-pile
San li ki nou ti pou ete?
Li donn delo ki sours lavi
Limem ki nou apel lapli...
Sours: Zimaz Google