5 Juillet 2017
Ankor enn zourne spesial zordi vouzot ! Anplis enn Zourne Internasional, silvouple. Enn zourne pou nou BA. Se dan bann lane 90 ki finn swazir le 6 Zilie pou selebre « La Journée du baiser ». Nou tom dakor ki isi « baiser » vedir aksion poz lalev lor enn parti lekor e non pa seki fer ar kalot, savat dodo ouswa rotin bazar la! E mo pa konn pou zot, me mo trouv sa enn mari zoli lide, mwa! Parski si nou reflesi, se enn ti zes banal ki ena boukou sans, sinifikasion ek linportans dan nou lavi toulezour me souvan nou tro okipe pou rann nou kont. Anplis nou bien bizin sa avek tou vilin kiksoz ki nou tande toulezour.
Ki li enn piouk dou kouma disik kan mama poz so lalev lor nou lazou ek fer gagn gidi-gidi. Bann bizou vantouz, kot bizin swiy lazou apre (lot kou zwe sove ou donn lame). Enn piouk-piouk vie tantinn ler may likou ek sa ti loder naftalinn ou lodkologn "Bien-Etre" ki pik nene. Enn ti piouk lor labous pou dir babay ou mersi gate. Bann seki nouvo lor larout, inpe timid, pa tro sir,"bez enn ti lagel" deryer bistop, dan ti touf ou lor banket deryer dan bis. Bann seki kontan met pikir moustik dan likou pou mark teritwar. Bann seki finn rate, les tras di-rouz lor kol semiz ; ena ferme ladan. Bann ki lanvi tro for, enn "kari lalang", enn avan-gou de seki pou deroule plitar.
Lor fron, lor lazou, lor lalev, dan likou ou kot anvi, bizou dou, mouy-mouye, sape, kokin, anflame... piouk, ba, "big bisou", ti bizou... enn sinbol kontan...kontan dan tou form, dan tou manier, kontan dan tou kouler, tou degre, kontan dan tou kiltir, dan tou krwayans.
Avek letan, finn ena gran evolision dan nou relasion avek ba. Kot nou, sa finn vinn natirel, mantalite, persepsion finn sanze. Ki sann-la kapav bliye ler ti ena enn ti senn « piouk-piouk » dan fim? Pa kone kot pou gete, papa grat lagorz, dir sanz senn ek lerla twa, enn sel kout to leve, to gagn for pipi. Si ena ti pe kasiet-kasiet, sey-seye, aster zero onte, pena zene, ni gagn traka spektater. Fer kouma dan fim, tir foto, tourn klip, difize lor tou rezo. Version 2.0 napa sansir!
Bann-la pe dir bizou bon pou lasante! Pa tro gagn onte si to pa pe al gym. To kapav fer de dan enn ! To ti kone ki dan enn ti seans “piouk-piouk” gate-koko, ena 34 misk ki travay? Vedir plis to anbrase, plis bann misk ek tisi dan to figir ranforsi ek anpes twa gagn rid! Anplis, to santi twa mari serye, li bon pou to leker, pou to lekor (to vinn pli rezistan, babay infeksion, alerzi!). Fer bizou rann twa ere, kan to ere to viv bien, to travay bien! Si mo kwar bann-la, enn-er-d-tan ba intansif permet bril ziska 150 kalori! Ki sann-la pou tante ? Bien tantan me inpe riske ; lalev zawaw, pa tro konseye !
Pli nou kontan, pli nou ba! Se enn bann premie zes tandres ek lafeksion. Bann ormonn zigile kan de lalev zwenn ek leker bat vit ek dir, wi mo kontan! Ek avek letan lamour pli grandi. Pli nou ba, pli nou kontan ! Enn ba pou dir mo aksepte, pou dir mersi. Enn ba pou pardone, pou dir mo regrete. Enn ba pou dir mo admire, mo apresie. Enn ba pou met dan siro, pou raprose. Enn ba pou dir mo kontan! Enn ba pou dir tou seki ena pou dir!
Alor, ki pe atann? Pa fer ler! Anou profit sa zour spesial-la pou nou ba, zot! Ti ba, gro ba, pou enn zour, anou bliye bakteri ek met tou move santiman dan vie kont. Anou ba!
MO BA ZOT TOU FOR!!!
/image%2F2217958%2F20190923%2Fob_d2d8fb_violence.gif)
/image%2F2217958%2F20190213%2Fob_bbcf31_heart-hands.jpg)
/image%2F2217958%2F20181004%2Fob_47a7ce_henryadams1-2x.jpg)
/image%2F2217958%2F20180307%2Fob_9c8027_28908263-10156747834870476-202015088-n.png)