KIFER ?

Bann resan evennman lor violans anver bann fam finn plis ki boulvers mwa ek mo panse se enn santiman partaze par boukou fam ek zom dan Moris. Sak nouvo ka ki pe tande, li enn ka de tro! Se vre ki li esansiel ki bann fam diboute ek fer tou pou sorti depi lanfer ki zot pe viv. Malerezman bann fam pa zis bann viktim me zot bizin ousi fer fas a bann prezize, bann zizman lasosiete. Donk li ankor pli inportan fer ledikasion bann zom, bann garson, bann adolesan, pou ki zot pran konsians ek pran zot responsabilte antan ki partner e non pa kouma enn bouro ou enn et siperyer. Li primordial ki lasosiete sanz so regar ek so fason panse. Li extremman inportan ki bann zom realize, mobilize pou montre zot soutien konkretman dan lalit kont violans konzigal pou ki kiksoz vremem kapav sanze.

Kifer?

Zot dir twa pa met mini-mini-dekolte

Parski sa pou atir bann zom-la zot lizie

Zot dir twa pa fer lagel, aret rezinbe

Parski sa pou fer zom-la plis exsite

Kifer?

Zot dir twa ki liberte ki to ape rode

Parski zom-la ki bizin gard to lakle

Zot dir twa abe twa fam ki to kone

Parski zom-la ki mari, limem ki dirize

Kifer?

Zot dir twa napa nek kit to fwaye

Parski to ena zanfan, to bizin reste

Zot dir twa manz to kou, kontigne

Parski zom-la ki donn twa manze

Kifer?

Zot dir twa enn klak sa, kapav arive

Parski zom-la sirman ti inpe strese

Zot dir twa sirman twa kinn rode

Parski zom-la zame pa ti pou tape

Kifer?

Zot dir twa ki to pa enn fam ki gagn bate

Parski zom-la li zis zoure, maltrete

Zot dir twa aret trouv zis seki move

Parski zom-la, se lamour ki li pe done

Kifer?

Zot dir twa to bizin siporte, kapitile

Parski zom-la dan so natir, li komande

Zot dir twa pran pasians, sa pou sanze

Parski zom-la apre kou li pou regrete

Kifer?

Zot dir twa leve, dir ase, kas lasenn ale

Parski zom-la sovaz, li pou kontign domine

Zot dir twa to bizin dibout lor mo de lipie

Parski zom-la bebet, li napa pou sanze

Kifer?

Zot dir twa to bizin for, rod enn sime sove

Parski zom-la, pou rod gard twa prizonie

Zot dir twa koze, revolte, plore, denonse

Parski zom-la zame li napa pou realize

Kifer?

Zot dir twa to ena valer, to bizin montre

Parski zom-la pou zis kraz to dignite

Zot dir twa to destin li dan to lame

Parski zom-la zame pou aksepte to ale

Kifer?

Zot dir twa pou ena soutien partou kote

Parski zom-la, lor li to pa pou kapav konte

Zot dir twa aster to pou an sekirite

Parski zom-la pou nepli kapav atake

Me kifer zot dir twa?

Wi! Kifer pa dir zom-la?

Kifer pa li ki pe tann sa?

Kifer pa li ki kit lakaz ale?

Parski se li kinn tape!

Kifer pa li ki bizin elwagne?

Parski se li kinn insilte!

Kifer pa li ki ramas beze?

Parski se li kinn alim dife!

Kifer pa li ki sibir koze?

Parski se li ki vremen merite!

Kifer pa li ki lapolis ramase?

Parski se li ki bizin ferme!

Kifer pa li ki pardone?

Parski se li kinn fer pese!

Kifer so lavi kontign roule?

Parski se li kinn fane!

Kifer li ankor pe arsele?

Parski li ti gagn lord pou ale!

Kifer depi zanfan pa pe montre?

Kifer mantalite pa finn evolie?

Kifer fam ankor bann obze?

Kifer pa pe sanz fason elve?

Kifer nanye pa pe avanse?

Kifer fam ki bizin aksepte?

Kifer zom pa devlop respe?

Kifer lavi fam ankor devaste?

Kifer zom napa oule korpere?

Kifer ankor ena inegalite?

Kifer soufrans enn banalite?

Kifer zom pa pran responsabilite?

Kifer fam ki bizin viktimize?

Kifer ankor pe exkize?

Kifer se fam-la ki zot zize?

Kifer ankor pe proteste?

Kifer fam pa pe proteze?

Kifer konsekans pa pe montre?

Kifer lazistis pa pe aplike?

Kifer fam ankor tromatize?

Kifer lavenir zanfan pe brize?

Kifer lalwa pa pe regle nanye?

Kifer lasosiete pe ferm lizie?

Kifer bann bouro an liberte?

KIFER? KIFER? KIFER?

Photos Credits: Google Images